زبان حال سے کہتی ہے کربلا کی زمیں

زبان حال سے کہتی ہے کربلا کی زمیں

خدا کے بندوں پہ کیوں تنگ ہے خدا کی زمیں

---

رہیں ادب کے تقاضے ہمیشہ پیشِ نظر

فلک جناب ہے خاصانِ باصفا کی زمیں

---

دہانِ ذرّہ جہاں کھول دے زبانِ سوال

ہزار گنج بکف ہے وہاں ، عطا کی زمیں

---

فلک کی آنکھ میں ترسیلِ گرد سے یہ کھُلا

جوابِ ظلم پہ مجبور ہے ، خدا کی زمیں

---

مزا تو جب ہے کہ مَیں سر کے بل وہاں پہنچوں

نہ آئے زیرِ قدم ، تیرے نقشِ پا کی زمیں

---

یہاں بھی قافلہء عرش سیر اُترا تھا

یہ کہہ رہی ہے ترے شہرِ جاں فزا کی زمیں

---

علی نے جب سے لقب بُو تراب کا پایا

کمالِ شوق سے ہے وجد میں ، خدا کی زمیں

---

کسی کی آخری ہچکی نہ تھی ، قیامت تھی

ہو جیسے آج بھی سکتے میں ، کربلا کی زمیں

---

ہوائے دامنِ زھرا تلاش کرتی ہے

کہاں وہ پھُول چھُپائے ہیں ؟ نَینوا کی زمیں

---

صد آفریں تجھے اے شوق ! کیا نکالی ہے

بیانِ کرب و بلا کے لیے ، بلا کی زمیں

---

کبھی پنپ نہیں سکتا نصیؔر ! نخلِ اثر

نہ ہو جو آبِ ندامت سے تر ، دُعا کی زمیں