کون کہتا ہے آقاؐ مدینے میں ہیں

کون کہتا ہے آقاؐ مدینے میں ہیں

میری آنکھوں میں ہیں میرے سینے میں ہیں

---

گلستانوں کو بھی جو میسر نہیں

ایسی خوشبوئیں ان کے پسینے میں ہیں

---

چین سے ساحلوں میں اُتر جاؤں گا

جتنی طغیانیاں ہیں سفینے میں ہیں

---

تشنگی بھی رگڑتی رہی ایڑیاں

کتنے زم زم مرے آبگینے میں ہیں

---

ہاتھ میری سماعت کے خالی نہیں

آپ کی آہٹیں اس خزینے میں ہیں

---

میرے ایماں نے کیا کیا تراشا مجھے

کتنے ہی جوہری اس نگینے میں ہیں

---

عاقبت کی مظفر مجھے فکر ہے

موت کے سارے انداز جینے میں ہیں