عبدِ عاجز کو ہے شوقِ رقمِ نعتِ رسولؐ

عبدِ عاجز کو ہے شوقِ رقمِ نعتِ رسولؐ

ذہنِ حسّانؓ! اِدھر بھی ہو توجّہ مبذول

---

تیرے اشعار میں محفوظ ہے پیکر اُن کا

تیرے افکار پہ ہے سایہ کُناں زلفِ رَسولؐ

---

تیری آنکھوں میں ہیں رقصاں وہ مناظر سارے

تُو نے دیکھی وہ جبیں اور وہ چشمِ مکحول

---

تیرے دامن سے مجھے اُن کی مہک آتی ہے

تیری فطرت میں ہے بیشک اُسی خوشبو کا حُلُول

---

تُو نے اُس ذاتِ گرامی کا زمانہ پایا

تیری توصیف میں جبریلِ ؑ امیں کا ہے شَمُول

---

منبرِ نعت کی تُو نے ہی صدارت پائی

شعر تیرے صفِ اَعدا پہ تھے سیف مسلُول

---

نرم لہجے میں وہ باتیں، وہ تبّسم اُن کا

حافظے میں ترے موجود ہیں وہ رنگ، وہ پھُول

---

زنگِ عصیاں سے مِرے دل کا ہے آئینہ سیاہ

پر توِ نُور سے ہے تیری جبلّت مصقول

---

اک ذرا اُس شہِ خوباں کے خدوخال بتا

جس کا جلوہ ترے اشعار کی ہے شانِ نُزول

---

وہ کہ خورشیدِ ازل ہے بہ سرِ چرخِ وُجود

جسے لاحق نہیں تا شامِ اَبد خوفِ اُفول