بھانویں کول بلا بھانویں دور ہٹا اساں در تے اوندیاں رہنا ایں
تیرے قدماں دے وچہ رو روکے دکھ درد سناؤندیاں رہنا ایں
نئیں دنیا دی پرواہ سانوں، غم خوار دے ناں دی چاہ سانوں
اساں یار دے ناں نوں چُم چُم کے اکھیاں نال لاؤندیاں رہنا ایں
ایمان اساڈا کہندا اے اسیں حشر نُوں بخشے جاواں گے
اساں یاد مدینے والے دی سینے نال لاؤندیاں رہنا ایں
جس در تے خاکی نوری وی سب جھکدے آکے رات دِنے
اس چوکھٹ تے سر رکھ اپنا تقدیر بناؤندیاں رہنا ایں
ہوندا جے بھروسہ آقا تے ایہہ ساری خدائی مل جاندی
جس سوہنے نوں آزماؤنا ایں اوہنے پچھتاؤندیاں رہنا ایں
جد تیکر دم وِچ دم ساڈا ایہہ یار ظہوریؔ کم ساڈا
سوہنے دی سوہنی محفل وچ تعریف سناؤندیاں رہنا ایں
شاعر کا نام :- محمد علی ظہوری
کتاب کا نام :- کِتھے تیری ثناء