دلدار جے راضی ہوجاوے دنیا نوں مناؤن دی لوڑ نئیں
دکھ یار نوں دسنا کافی اے غیراں نوں سناؤن دی لوڑ نئیں
دکھ یار دا دارو درداں دا، جوں جوں ودھدا تے سُکھ ملدا
جد یار دے غم دا زخم لگے، فیر مرہم لاؤن دی لوڑ نئیں
جند نکلے یار دے قدماں وچہ، ایمان مکمل ہوجاوے
جنہوں ہتھیں مرشد ٹور دیوے، اوہنوں راہ سمجھاؤن دی لوڑ نئیں
زاہد کیہہ متّاں دینا ایں، مت ماری تیری عقلاں نے
جس تکیاں اکھیاں یار دیاں، اوہنوں سبق پڑھاؤن دی لوڑ نئیں
نیڑے ہووے یا دور ہووے آقا دی نظر منظور ہووے
جیہڑا مر جائے یار دے قدماں وچہ محشر نوں اٹھاؤن دی لوڑ نئیں
ناں لے کے ظہوریؔ سوہنے دا ہر مشکل حل ہوجاندی اے
اک ناں دا وظیفہ چھڈ کے تے، کوئی سبق پکاؤن دی لوڑ نئیں
شاعر کا نام :- محمد علی ظہوری
کتاب کا نام :- کِتھے تیری ثناء