دوہاں عالماں چہ ہوئیاں رُشنائیاں ، ہے نور بے مثال آگیا
پیاں جگ وچ جیہدیاں دوہائیاں ، اوہ آمنہ دا لال آگیا
جھنڈا عرش اُتے جیس دا جھلایا اے ، جہدی شان چہ قرآن سارا آیا اے
روڑاں دتیاں سی جہدیاں گواہیاں، اوہ سخی لجپال آگیا
جیہڑا وارث اے غریباں تے یتیماں دا ، بیڑا تار دیتا جہنے سی حلیمہ دا
جہنوں سمجھیا یتیم ہے سی دائیاں اوہ صاحب جمال آگیا
جیہڑا آسرا اے سارے خطا کاراں دا ذمہ آپ لیا جہنے گنہگاراں دا
جہدے نام نے وی ڈبیاں ترائیاں اوہ ماڑیاں دی ڈھال آگیا
خاص ساڈے اُتے کرم اے حضور دا ، سدا کرناں میلاد اساں نور دا
سبھے نعمتاں حضور جھولی پائیاں ، جاں لباں تے سوال آگیا
دوہاں عالماں دا آیا اج والی اے ، رہنا صائم اج کسے وی ناں خالی اے
گھر آمنہ دے جنتاں وی آئیاں ، جاں نبی باکمال آگیا
شاعر کا نام :- علامہ صائم چشتی
کتاب کا نام :- کلیات صائم چشتی