گلاب چاند شہنشہ اِمام کیا کیا ہے
مِرے حضور کا اِک اِک غلام کیا کیا ہے ؟
تمہارے قدّ و دہَن اور زُلف کیا کہنا
کہ جن کی شاں میں الف ، میم ، لام کیا کیا ہے ؟
مِلا جو تیرے غلاموں کو ، ہے وَرائے شُمار
اَماں عذاب سے ، کوثر کا جام کیا کیا ہے ؟
لَبان و عارِض و گیسو کے نعت خوانوں میں
گلاب ، لَعل ، دَمِ صبح ، شام کیا کیا ہے؟
طفیلِ نعت جو مِلتی ہیں ،اُن عطاؤں میں
نشاطِ روح ،غِنا ،لطفِ تام۔ کیا کیا ہے ؟
ثنائے زلف کے شایاں نہیں ، برائے بیاں
اگرچہ مُشک ،گَھٹا، شب ، غَمام ، کیا کیا ہے ؟
یہ کائنات بنی اور بزمِ حشر سجی
ہوا تمہارے لیے اہتِمام کیا کیا ہے ؟
سجا ہے عالَم بالا ، تھمی ہے نبضِ جہاں
شبِ عروج ہوا انتظام کیا کیا ہے ؟
بَقیدِ نار کِیا ، کھولے عَیب ، خالِق نے
تِرے عَدو سے لیا انتقام کیا کیا ہے
حضور ! عرض خدا سے کریں کہ محشر میں
نہ پوچھ میرے معظم سے کام کیا کیا ہے ؟
مِرا کلام یہ عُشّاق سُن کے بول اٹھے
سناؤ اور معظمؔ ! کلام کیا کیا ہے ؟
شاعر کا نام :- معظم سدا معظم مدنی
کتاب کا نام :- سجودِ قلم