حُسنِ بہاراں جانِ دو عالم صلی اللہ علیہ وسلم
ہادئ اُمت ، رہبرِ اعظم ، صلی اللہ علیہ وسلم
عکس جمالِ حُسنِ الٰہی ، رحمتِ رحماں ظلِّ پناہی
ختمِ رسالت ، نعت اتمم، صلی اللہ علیہ وسلم
ایسی اِک تصویر بنائی ، جس کا مصوّر خود شیدائی
ذکر ہمارا کیا ، اور کیا ہم ، صلی اللہ علیہ وسلم
ذوقِ سفر کو عرش مکاں ہے گردِ سفر میں کاہکشاں ہے
خادم ہیں جبریلِ مکرّم ، صلی اللہ علیہ وسلم
جن کا مبارک نام اذاں میں ، جن کا مقدس ذکر قرآں میں
سب سے مؤ خّر ، سب پہ مقدمّ ، صلی اللہ علیہ وسلم
صبح انہی کے شام انہی کے ، گردش میں سب جام انہی کے
عظمتِ انساں رُتبۂ آدم ، صلی اللہ علیہ وسلم
نیند ہماری چین ہمارا ، نامِ محمد پیارا پیارا
غم کا مداوا ، زخم کا مرہم ، صلی اللہ علیہ وسلم
ایک طرف سب خلقِ خدا ہے ایک طرف وہ صلِّ علیٰ ہے
ہر شے ان کی شان سے ہے کم ، صلی اللہ علیہ وسلم
حسنِ سخن صد رنگِ گلستاں ، جنبشِ لب آغازِ بہاراں
اُمی کی گفتار کا عالم ، صلی اللہ علیہ وسلم
عرشی فرشی جن و ملائک ، حور و غلماں اور ادیبؔ
ان کی ثناء میں ہر پل ہر دم ، صلی اللہ علیہ وسلم
شاعر کا نام :- حضرت ادیب رائے پوری
کتاب کا نام :- خوشبوئے ادیب