کبھی جو تجھ کو تَصوُّر میں نگہبان دیکھا
اس ایک لمحے پہ صدیوں کا سائباں دیکھا
ترے ہی نُور سے تھے اِکتساب کے چرچے
زمیں کو دیکھ کے جب سُوئے آسماں دیکھا
اِسی لیے تو ہے محبوبِ کبریا ترا نام
جہاں جہاں تجھے ڈھونڈا ‘ وہاں وہاں دیکھا
ہر اک صدی میں ‘ہر اک بزم میں ‘ہر اِک دِ ل میں
ترا پیامِ محبت رواں دواں دیکھا
مری حیات ہے گر تیری یاد کی تجسیم
تو ایسی یاد کا اک پل نہ رائیگاں دیکھا
سدا گواہ ہے تاریخ نوعِ انساں کی
کہ تجھ سا کوئی نہ ہمدردِ بیکساں دیکھا
نگاہ اُس کی ‘ حدِ لامکا ں بھی چِیر گئی
ترے ندیمؔ نے جب تیرا آستاں دیکھا
شاعر کا نام :- احمد ندیم قاسمی
کتاب کا نام :- انوارِ جمال