کبھی وہ گُنبدِ خضرٰی مدینے جا کے دیکھیں گے

کبھی وہ گُنبدِ خضرٰی مدینے جا کے دیکھیں گے

مرے مولا نے گر چاہا مدینے جا کے دیکھیں گے

---

تمنّا ہے مدینے کی ، مُقدّر گر ہوا یاور

خوشی کا وہ حَسیں لمحہ مدینے جا کے دیکھیں گے

---

جسے دیکھا تصوّر میں ،اُسے پھر سر کی آنکھوں سے

مرے سرکار کا روضہ مدینے جا کے دیکھیں گے

---

جہاں دن رات آتے ہیں ، فرشتے آسمانوں سے

سو آنکھوں سے وہی خطّہ مدینے جا کے دیکھیں گے

---

فروزاں ہے زمیں پر جو ترے نعلَین کے صدقے

اُسی جنّت کا پھر جلوہ مدینے جا کے دیکھیں گے

---

جہاں کا ایک سجدہ بھی کیا ہو گویا جنّت میں

تو جنّت کا وہی رستہ مدینے جا کے دیکھیں گے

---

دیا اِذنِ حضوری تو مواجہ پر کھڑے ہو کر

سُنہری جالیاں آقا ! مدینے جا کے دیکھیں گے

---

بڑا ہے دیدنی لوگو ! ادب اہلِ مدینہ کا

سوآنکھوں سے ادب اُن کا مدینے جا کے دیکھیں گے

---

جلیل آئیں گے وہ لمحے ، کبھی تو زندگانی میں

کہ منظر پھر مدینے کا مدینے جا کے دیکھیں گے