مُقدّر گر ہوا یاور مدینے ہم بھی جائیں گے

مُقدّر گر ہوا یاور مدینے ہم بھی جائیں گے

نظر کی تشنگی ساری وہیں جا کر مٹائیں گے

---

دلِ نازک میں اب ہمّت کہاں ہے ہجر و فرقت کی

ملے اُنکی اجازت تو وہیں کُٹیا بسائیں گے

---

بُلاوا آ گیا تیرا مدینے جا رہا ہے تو

مرے احباب یہ اِک دن مُجھے مُژدہ سُنائیں گے

---

یہ آنکھیں بھیگ جائیں گی،ترے روضے کو تکتے ہی

خوشی وہ دیدنی ہوگی جو آنسو جِھلملائیں گے

---

ہمیشہ غمزدوں کی جو کیا کرتے ہیں دلجوئی

تو رو کے ہم بھی حال اپنا اُنہی کو جا سُنائیں گے

---

عمل کوئی نہیں ہے لائقِ بخشش مرا ،لیکن

یقیں ہے مُجھ کو دوزخ سے مرے آقاْ بچائیں گے

---

کریں گے رشک ان کی قسمتوں پر لوگ محشر میں

لِوائے حمد کے نیچے، جنہیں سرکار لائیں گے

---

درودِ پاک کے حلقے جہاں سجتے رہے دائم

تو بام و در اُسی گھر کے ہمیشہ جگمگائیں گے

---

درود اُن پر جلیل اپنی ،ہے پُونجی زندگانی کی

یہ انوارِِ مُحبّت ہی لحد میں کام آئیں گے