نہیں ہے لا اِلٰہ کوئی مگر اللہ ، اِلا اللہ

نہیں ہے لا اِلٰہ کوئی مگر اللہ ، اِلا اللہ

نظر کا راز اِلا اللہُ محمّد ؐ ہیں رسول اللہ

---

عباد اللہ ڈرو حق سے ‘ بھلا دو وہم غیر اللہ

پھر و ہر سُو مگر دیکھو جمالِ عین وجہُ اللہ

---

تمھاری مشکلوں کا حل نہیں ہے فتنہ سازی میں

جھکو راہِ خُدا میں ورنہ آیا ہے عتاب اللہ

---

یہ مستانوں کی دُنیا ہے بچو ان خرقہ پوشوں سے

لُٹا دو دولت دُنیا جہاں میں فی سبیل اللہ

---

ہے خیبر توڑنے والا مسلمان ِ ازل کوئی

کہ بیٹا ہو شہیدِ ناز گو فخرِ ذبیح اللہ

---

جنونِ با خبر کیا ہے ‘ خرد کی راہگذر کیا ہے

!شہودِ جلوہء جاناں ‘ حدیثِ ماسوا اللہ

---

نظر آتے ہیں مجھ کو قافلے لُٹتے ہوئے کوئی

بچے وہ لوگ جو سمجھے ہیں کیا تلک حدود اللہ

---

یہ بستی ہے فقیروں کی امیروں نہ وزیروں کی

کہ تقویٰ چاہئے تا کہ عیاں ہو سرِ عند اللہ

---

نہ سمجھو گے تو مِٹ جاؤ گے پہلے بھی بتایا تھا

مگر تم ہو کہ سَر پر جب پڑے کہتے ہو یا اللہ

---

بڑی باتیں ہیں کہنے کی مگر چپ ہو گیا واصِفؔ

ہے اذنِ شاہوارِ کل وصی مرسل کہ ظل اللہ