فراقِ طیبہ میں دن بہ مشکل تمام کرتی ہیں میری آنکھیں

فراقِ طیبہ میں دن بہ مشکل تمام کرتی ہیں میری آنکھیں

یہی نہ پوچھو کہ کس طرح صبح و شام کرتی ہیں میری آنکھیں

---

بڑے سلیقے کے ساتھ ہوتی ہے پیشِ آقا میری حضوری

درود پڑھتی ہیں میری سانسیں سلام کرتی ہیں میری آنکھیں

---

یہ صرف آنسو نہیں ہیں میرے جو قطرہ قطرہ جھلک رہے ہیں

یہ ایک اندازِ گفتگو ہے کلام کرتی ہیں میری آنکھیں

---

حرم کی حرمت کا پوچھنا کیا کہ وہ تو کعبہ ہے اہلِ دل کا

وہاں کے ایک ایک ذرّے کا احترام کرتی ہیں میری آنکھیں

---

دیارِ اقدس کے ہر مکیں کو گلے لگاتی ہیں مخلصانہ

تو ہر گدا کو مودبانہ سلام کرتی ہیں میری آنکھیں

---

نہ خواب گاہوں میں اہلِ زر کی نہ رہ گزاروں میں تاجور کی

گدا ہیں جن کی انہیں کے در پہ قیام کرتی ہیں میری آنکھیں

---

بصد عقیدت سُنا سُنا کر کلام اقبؔال محفلوں میں

عروجِ دینِ نبیؐ کا بھی اہتمام کرتی ہیں میری آنکھیں