!خاور کہوں کہ بدرِ منّور کہوں تُجھے
!محشر کہوں کہ داورِ محشر کہوں تجھے
اے مظہرِ جمالِ خدا سیّد البشرؐ
حُسنِ مثا ل کا میں محور کہوں تجھے
سلطانِ انبیاء ہے تِری ذاتِ با صفا
اوّل کہوں یا اوسط و آخر کہوں تجھے
تجھ پر ہوئی ہے ختم نبّوت کی داستاں
خاتم پیمبروں کا پیمبر کہوں تجھے
تھا سینئہ صدف میں خدا کنزِ مخفیاً
تخلیقِ کائنات کا گوہر کہوں تجھے
بے مثل و بے مثال ہے تو دِلرُبا ئے حق
رعنائی خیال کا پیکر کہوں تجھے
آئینہ جمالِ ازل ذاتِ مصطفےٰؐ
تو عین ذاتِ حق ہے یہ کیونکر کہوں تجھے
موجِ خرام ناز ہے تو ساحِلِ مُراد
دریائے معرفت کا شناور کہُوں تجھے
قندیل بزم ِ عِلم و عمل آپؐ کا وجُود
ہر آگہی کا مرکز و مصدر کہوں تجھے
بندہ نواز تجھ کو کہوں یا کہُوں بشر
تقویمِ حسن و عِشق کا مظہر کہوں تجھے
دُر یتیم و اُمّی لقب صاحب الجمال
میں تاجور کہوں کہ سخنور کہوں تجھے
ہے ذاتِ کِبریا بھی ثنا خوانِ مصطفےٰؐ
منزل کہوں کہ حق کا مسافر کہوں تجھے
ہر ذرّے کی زباں سے آتی ہے یہ صدا
کوئی نہیں کہ جس کا برابر کہوں تجھے
واصؔف کی کیا مجال کہے اس زبان سے
!اللہ کی زبان ہو دلبر کہوں تجھے
شاعر کا نام :- واصف علی واصف
کتاب کا نام :- ذِکرِ حبیب