مائل بہ کرم ‘ چشمِ عنایات بھی ہوگی
خورشید سے ذروں کی ملاقات بھی ہوگی
مایوس نہیں ہیں شہِ خوباں ؐ کے بھکاری
تقسیم کبھی حسن کی خیرات بھی ہو گی
کٹ جائیں گے ایام میری تشنہ لبی کے
میخانہ سلامت رہے برسات بھی ہوگی
آئے گی جہاں گیسوئے واللیل کی خوشبو
سجدہ بھی ادا ہوگا مناجات بھی ہوگی
یہ دور بڑے نام سے منسوب ہوا ہے
اُس نام کی نسبت سے مکافات بھی ہوگی
آقاؐ کبھی بدلیں گے میرے شام و سحر بھی
تبدیل کبھی صورتِ حالات بھی ہوگی
چمکے گی درو بام کی تقدیر بھی واصؔف
اِس گھر پہ کبھی تابشِ لمحات بھی ہوگی
شاعر کا نام :- واصف علی واصف
کتاب کا نام :- ذِکرِ حبیب