قلم سے لوح سے بھی قبل

قلم سے لوح سے بھی قبل ، دن سے رات سے پہلے

نبیؐ کا نور تھا موجود، موجودات سے پہلے

---

میں اپنی سمت بھی اب اُس طرف سے ہو کر آتا ہوں

محمدؐ کی گلی پڑتی ہے کوئے ذات سے پہلے

---

کھُلا کرتی ہیں نامعلوم سے معلوم کی راہیں

خدا کی نفی کرتی ہے زباں اثبات سے پہلے

---

اُنہی کا ہر عمل ہر بات بہبودِ بشر ٹھہری

نہ تھا منشور ایسا خطبہء عرفات سے پہلے

---

تلاوت دیدہء آدم نے کی اسم محمدؐ کی

ستونِ عرش پر کندہ تھا التّحیات سے پہلے

---

وہی تھے صرف جو تلوار لےکر غار سے نکلے

نبیؐ کوئی نہ صف آراء ہوا، غزوات سے پہلے

---

مظفر بیٹیوں کو باپ زندہ گاڑ دیتے تھے

بہت جاہل تھی دنیا انکی تعلیمات سے پہلے