یَا رَحمَتہ لِّلعَالَمِیں
اِلہام ، جامہ ہے ترا
قرآں ، عمامہ ہے تِرا
مِنبر تِرا ، عرشِ بریں
یا رحْمَتہ لِلّعَالَمِیں
آئینہِ رحمت بدن ، سانسیں ، چراغِ عِلم و فن
قُربِ الٰہی ، تیرا گھر، الفقُر فخری ، تیرا دھن
خُوشبو تِری ، جوئے کرم
آنکھیں تِری ٗ بابِ حَرم
نُورِ ازل ، تیری جبیں
یَا حمتَہ لِلّعَا لَمِیں
تیری خموشی بھی اذاں ، نِیندیں بھی تیری رَت جگے
تیری حیاتِ پاک کا، ہر لمحہ پَیغمبر لگے
خیر البشر، رُتبہ تِرا
آوازِ حق، خُطبہ تِرا
آفاق ، تیرے سا معیں
یَا رَحمَتہ لِّلعَالَمِیں
قبضہ تِری پر چھائیں کا ، بِینائی پر اِدراک پر
پَیروں کی جنبش خاک پر، اور آہٹیں اَفلاک پر
گردِ سفر ، تاروں کی ضَو
مرکب ، براقِ تیز رَو
سائیس ، جبریلِ امیں
یَا رَحمَتہ لِّلعَالَمِیں
تُو آفتاب ِ غار بھی تُو پرچمِ یَلغار بھی
عجزو وفا بھی پیار بھی، شہ زور بھی سالار بھی
تِری زرہ ، فتح و ظفر
صِدق و صفا، تِری سپر
تیغ و تبر، صَبر و یقیں
یَا رَحمَتہ لِّلعَالَمِیں
پھِر گُدڑیوں کو لعل دے ، جاں پتھّروں میں ڈال دے
حاوی ہوں مُستقبل پہ ہم ، ماضی سا ہم کو حال دے
دعویٰ ہے تیری چاہ کا
اِس اُمّیتِ گمراہ کا
تیرے سِوا کوئی نہیں
یَا رَحمَتہ لِّلعَالَمِیں
شاعر کا نام :- مظفر وارثی
کتاب کا نام :- بابِ حرم