چنگی اے میرے سنگیو سنگت فقیر دی
چنگی اے میرے سنگیو سنگت فقیر دی
وکھری اے سارے رنگاں چوں رنگت فقیر دی
الله دی سونہہ ہے مٹی نوں اکسیر کر دیوے
آجاوے موج وچہ جے طبیعت فقیر دی
آوے جے کوئی کول تے بھر دین جھولیاں
سارے ای جان دے نیں سخاوت فقیر دی
دکھ دین والے تائین وی دیندے نے ایہہ دعا
دیکھو ایہہ کڈی سوہنی ایں عادت فقیر دی
اللہ اوناں دی رکھدا عزت تے آبرو
دل نال جیہڑے کر دے نیں عزت فقیر دی
دنیا دے بادشاہ وی دیندے سلامیاں
منی ایں ایناں نیں وی حکومت فقیر دی
عظمت اوہدی دے رہن گے بلدے سدا چراغ
تسلیم کر لئی جہنے عظمت فقیر دی
کوئی نہ جانے جیہڑیاں بولے ایہہ بولیاں
جانے کوئی فقیر ای فطرت فقیر دی
ایویں حقیر سمجھیں نہ ایناں نوں بیلیا
ہندی خدائی ساری وراثت فقیر دی
آجاوے یاد اللہ تے محبوب اوسدا
جس ویلے وی چا دیکھئے صورت فقیر دی
میرے نیازی ناں دیاں دھماں نے پے گئیاں
حاصل جدوں توں ہو گئی نسبت فقیر دی