اسم لکھّوں کہ اسمِ ذات لکھوں
ہر طرح آپؐ کی صفات لکھوں
ہادی و حامی و نصیر کہوں
پاسبانِ ہمہ جہات لکھوں
رحمت و رافت و رؤف ہیں آپؐ
آپؐ کو جانِ التفات لکھوں
جِس قدر جانتا ہوں نام پڑھوں
جتنی معلوم ہیں صفات لکھوں
رہے وردِ زباں درُود و سلام
اور اِسی کو درُونِ ذات لکھوں
رُوح تو ذِکر کرتی جائے گی
رُوح کو کیسے بے ثبات لکھوں
کون ہے آپؐ کا عدیل و مثیل؟
پھر کِسے فخرِ کائنات لکھوں؟
ایک بھی وصف ذاتِ والا کا
لکھنا چاہوں تو تا حیات لکھوں
بس خدا آپؐ کا ہے مرتبہ داں
لاکھ باتوں کی ایک بات لکھوں