اللہ کرم اللہ کرم آباد رہے نعتوں کا جہاں

اللہ کرم اللہ کرم آباد رہے نعتوں کا جہاں

اس نعت نبی کی نسبت سے کھوٹا بھی کھرا ہوتا ہے یہاں

---

انداز ہو جامی ؔ کا جس میں سعدؔی کا لب و لہجہ ہو جہاں

پھر نعت شفا دیتی ہے اُنھیں مجروحِ ستم جو بھی ہو جہاں

---

دوری پہ مدینے سے اپنی روتے ہیں جو راتوں کو اُٹھ کر

ہے ذکرِ شہ ِ لولاک لما، ان درد کے ماروں کا درماں

---

اللہ کرم جس پر کر دے جامیؔ بھی وہی سعدی ؔ بھی وہی

ہر اِک کو رنگ جدا بخشا ہر اک کو جدا بخشی ہے زباں

---

واعظ مجھے اتنا بھی نہ ڈرا ، میں خوف سے تیرے مر جاؤں

کچھ ابرِ کرم کی بات بھی کر ، پیاسے ہیں کرم کے لوگ یہاں

---

پھر علم کی بے توقیری ہے پھر جہل کا بول ہے نعتوں میں

آجاؤ خدا را پھر جامیؔ مٹ جائیں جہالت کے یہ نشاں

---

پڑھتے بھی سہی لکھتے بھی سہی ، آداب ثنا کے جانتے سب

گر ہاتھ میں دُرّہ اپنا لیے آجاتے اگر فاروق یہاں

---

اب ایسی نعت ادیبؔ نہ لکھ منصور کا سا انجام نہ ہو

ہاتھوں میں سبھی کے پتھر ہیں اور جہل ہے تیرا دشمنِ جاں