بنی اے جان تے بھاری مصیبت یارسولؐ اللہ
لوو ساراں کہ وگڑی اے طبیعت یارسولؐ اللہ
تہاڈے واسطے دے نال کرناں عرض رب اگّے
کہ ویکھاں چھیتی میں صحت دی صورت یا رسولؐ اللہ
طریقہ صبر پچھوں شکر والا بُھل دا جاندا اے
مَیں قائم رکھ سکاں کجھ تہاڈی سُنت یارسولؐ اللہ
ہے منزل ڈاہڈی اوکھی پیر نہ تھڑکے کِتے میرا
ہمیشہ نال ہووے تہاڈی رحمت یا رسولؐ اللہ
معافی رب دے کولوں لے دیا جے اپنے تائب ؔ نوں
ہوئی یاں ہو سی اُس کولوں جو غفلت یا رسولؐ اللہ
مِرے پروار دی عزّت ودھاؤ یا رسولؐ اللہ
ہر اک اُتّے کرم دی جھات پاؤ یا رسولؐ اللہ
تری اُمّت دا مندا حال اے دو جگ دیا شاہاؐ
توجہ نال روگ ایہدے گواؤ یا رسولؐ اللہ
ایہہ تکّے ہتھ غیراں دے رُلے نہیرے دی گھاٹی وچ
دھیان ایہدا ربّ اپنے ول لواؤ یا رسول ؐ اللہ
بھٹکدی پھر رہی اے قوم تیری او کڑاں اندر
ایہنوں مڑ اپنے رستے تے چلاؤ یارسولؐ اللہ
مسلماناں دے ول جو اٹھدیاں ہر دم نظر آون
اوہناں سبھ آفتاں کولوں بچاؤ یا رسولؐ اللہ
ربّ اگے عرض کر اچا تری امت دا سر ہووے
گواچی ہوئی تھاں سانوں دواؤ یا رسولؐ اللہ
شاعر کا نام :- حفیظ تائب
کتاب کا نام :- کلیاتِ حفیظ تائب