بے اجازت اُس طرف نظریں اُٹھا سکتا ہے کون

بے اجازت اُس طرف نظریں اُٹھا سکتا ہے کون

وہ نہ بُلوائیں تو اُن کے در پہ جاسکتا ہے کون

---

خالقِ کُل، مالکِ کُل، رازقِ کُل ہے وہی

یہ حقائق جز شہِ بطحیٰ بتا سکتا ہے کون

---

اک اشارے سے فلک پر چاند دو ٹکڑے ہُوا

معجزہ یہ کوند یکھے گا؟ دِکھا سکتا ہے کون

---

کس کی جرأت ہے نظر بھر کر اُدھر کو دیکھ لے

دیدہ وَر ہو کر بھی تابِ دید لاسکتا ہے کون

---

ہم نے دیکھا ہے جمالِ بارگاہِ مصطفیٰ ؐ

ہم سے اِس دُنیا میں اب آنکھیں مِلا سکتا ہے کون

---

نام لیوا اُن کا ہے اوجِ فلک تک باریاب

کوئی یُوں اُبھرے تو پھر اُس کو دبا سکتا ہے کون

---

اللہ اللہ! عید میلادِ نبیؐ کا غُلغُلہ

اِس شرف، اِس شان سے دُنیا میں آسکتا ہے کون

---

بارگاہِ مصطفیٰ ؐ میں یہ صحابہ کا ہجوم

اِتنے تابندہ ستارے یُوں سجا سکتا ہے کون

---

جن کو دنیا میں نہیں اُن کی شفاعت پر یقیں

حشر میں اُن کو جہَّنم سے بچا سکتا ہے کون

---

دارِ فانی میں محبت اُن کی ہے وجہِ بقا

جو نصیرؔ اُن پر مِٹا، اُس کو مِٹا سکتا ہے کون