ایہہ دو دن دا میلہ ایہہ دو دن دی یاری
نبھاؤندا نئیں یاری کوئی عمر ساری
ایہ دنیا نہیں کردی کسے تھیں وفاواں
ایہ نہیں دیکھ سکدی کسے سر تے چھاواں
ایہ دنیا فریبی نکمی نکاری
جدوں وچ قبر دے نکیراں نے اوناں
تیرے کولوں جس ویلے پچھناں پچھاناں
اودوں آوے گی مصطفی دی سواری
تیرے کم اونے نہیں تیرے پیارے
تیرے ساہنواں دے سودے رک جانے سارے
جدوں آئے در تے اجل دے بیوپاری
اوتھے پچھنیاں نئیں کسے نے وی ذاتاں
اوہدے فضل تھیں ہونیاں سدھ براتاں
تے کجھ کم آوے گی پرہیز گاری
توں گھر اصلی بھلیاں ایں ایس گھر چہ آکے
توں لاؤناں ایں ڈیرہ جیہیرے گھر چہ جاکے
تیرے اوس گھر دا نہ بوہا نہ باری
کریں اٹھدا بندا سدا الله الله
تاں ہووے گا آباد دل دا محلہ
توں لا اپنے اللہ نبی نال یاری
جناں ہو سکے کم نیکی دا کر لے
توں دامن نوں عملاں دے پھلاں تھیں بھر لے
توں کر اوتھے جاون دی کجھ تے تیاری
کرم ہوناں اوہناں دے اتے نیازی
اوہناں اتے ہوسی میرا اللہ راضی
جنہاں عمر عشق نبی وچ گزاری
شاعر کا نام :- عبدالستار نیازی
کتاب کا نام :- کلیات نیازی