چل چلئے مدینے دُکھ دُور ہوون گے
اکھاں سامنے مدینے چ حضور ہون گے
جالیاں تے اکھاں جدوں ٹھہر جانیاں
پھیر سامنے نظاریاں دے طور ہون گے
کناں سوہن تے نرالا اوہ نظارا ہووے گا
رند پیوندے جاں شربتِ طہور ہون گے
ٹھنڈ سینیاں تے دلاں تائیں پیندی جائے گی
نین ہنجواں دے نال شرابور ہون گے
جد زائراں تے ہووے گی نگاہ آپ دی
معاف ساریاں خطاواں تے قصور ہون گے
اوتھے اوہناں دل والیاں دی دید ہووئے گی
دل کھول کے سمیٹ دے جو نور ہون گے
صائم اوہناں دِلاں تائیں وی حضور جوڑنا
ہو کے آئے جیہڑے اوتھے چُور چُور ہون گے
شاعر کا نام :- علامہ صائم چشتی
کتاب کا نام :- کلیات صائم چشتی