چل میرے قلبِ زار مدینہ شریف میں
سب کے ہیں غمگسار مدینہ شریف میں
چہرہ ہو پُر غبار مدینہ شریف میں
مل جائے یہ وقار مدینہ شریف میں
نامعتبر حیات بھی ہوتی ہے معتبر
بٹتا ہے اعتبار مدینہ شریف میں
پاتے ہیں نورچہرے،مہک جاتے ہیں بدن
ضوبار و مشکبار مدینہ شریف میں
صیادِ موت ! تجھ سے یہی التجا ہے بس
کرنا مِرا شکار مدینہ شریف میں
ان کے کرم سے ہوگا کسی روز دیکھنا
مجھ سا گناہ گار مدینہ شریف میں
سن لیتے ہیں شفیقؔ کے دل کی پکار بھی
رہتے ہیں وہ ہزار مدینہ شریف میں
شاعر کا نام :- شفیق ؔ رائے پوری
کتاب کا نام :- متاعِ نعت