چل پو مدینے دِلا جھولی نوں پھیلا کے
راہواں وچ روندا جاویں راہواں نوں روا کے
جالیاں نوں چم چم لیکھاں نوں سنوار لے
ہجر وچ سڑیاں ہوئیاں آکھیاں نوں ٹھار لے
آویں ناں توں فیر اوتھوں اکواری جاکے
چل پو مدینے دِلا جھولی نوں پھیلا کے
پُچھ لے حدیث کولوں پچھ لے قرآن توں
گلیاں مدینے دیاں ودھ نے جنان توں
پھردا سی یار جتھے رُوپ نُوں وٹا کے
چل پو مدینے دلا جھولی نوں پھیلا کے
آن کے فرشتے جتھے گردناں جُھکاوندے
پیر بنا کے سر دے ولی جتھے آوندے
گل کرے رب جہدی قسماں اُٹھا کے
چل پو مدینے دلا جھولی نوں پھیلا کے
اوتھے ای صدیق عمر اوتھے مصطفیٰ اے
اوتھے ای خُدائی ساری اوتھے ای خُدا اے
جُھکیا اے عرش اکھاں روضے ولے لا کے
چل پو مدینے دلا جھولی نوں پھیلا کے
دل دیاں سکاں صائم فیر ہین لہنیدیان
گل وچ پلا ہووئے اکھاں ہون ویہندیاں
سوہنے نوں سلام آکھاں اتھرو بہا کے
چل پو مدینے دلا جھولی نوں پھیلا کے
شاعر کا نام :- علامہ صائم چشتی
کتاب کا نام :- کلیات صائم چشتی