میں ایک عاصی رحمت نگر حضورؐ کا ہوں

میں ایک عاصی رحمت نگر حضورؐ کا ہوں

زہے نصیب فقیرِ نظر حضورؐ کا ہوں

---

لگا سکے تو لگائے کوئی مری قیمت

گدا تو ہوں ‘ میں گدا بھی مگر حضورؐ کا ہوں

---

بھرم ہنوز سلامت ہے میری غیرت کا

خدا کا شکر کہ دریوزہ گر حضورؐ کا ہوں

---

ثنائے آقا سے نسبت ہے میرا عزّ و شرف

کہ ہوں تو میں بھی سخنور مگر حضورؐ کا ہوں

---

میں جیسا بھی ہوں جو کچھ بھی ہوں انہی کا کرم

زفرق تابہ قدم سربسر حضورؐ کا ہوں

---

میں عام کرتا ہوں محفل میں اسوہء سرکارؐ

بہ فیض نعت میں پیغام بر حضورؐ کا ہوں

---

اب اس سے بڑھ کے مِرا اعتبار کیا ہوگا

گناہ گار بہت ہوں مگر حضورؐ کا ہوں