نہ فکر مند ہو دامن میں جس کے زر کوئی نئیں

نہ فکر مند ہو دامن میں جس کے زر کوئی نئیں

حضور بانٹ رہے ہیں اگر مگر کوئی نئیں

---

ورا ہیں فہمِ بشر سے مراتبِ سرور

خدا تو مرتبہ داں ہے مگر بشر کوئی نئیں

---

ڈرا نہ اس کو حساب و کتاب سے واعظ

غلامِ شافعِ محشر ہے اس کو ڈر کوئی نئیں

---

درودِ پاک سے چھاؤں کشید کرتے رہیں

میانِ حشر کڑی دھوپ ہے شجر کوئی نئیں

---

ابھی تو خام ہیں کشتِ ثنا میں برگ و شجر

ہماری شاخِ ہنر پر ابھی ثمر کوئی نئیں

---

اگرچہ کہتے ہیں استادِ فن مجھے لیکن

حضور! نعت کے شایاں مرا ہنر کوئی نئیں

---

مواجہہ پہ مجھے دل کا حال کہنا ہے

سوائے اس کے مرا مقصدِ سفر کوئی نئیں

---

حضور! سنگِ درِ نور پر ہی رہنے دیں

غریبِ شہر ہوں سرکار میرا گھر کوئی نئیں

---

اٹھا کے ہاتھ طلب کر رہا ہوں حرفِ ثنا

سوائے اس کے مرے ہاتھ میں ہنر کوئی نئیں

---

یہی ہے راہِ مدینہ برائے خلدِ بریں

برائے خلد کہیں دوسری ڈگر کوئی نئیں