دنیا میں اَور بھی ہیں مگر آپؐ آپؐ ہیں

دنیا میں اَور بھی ہیں مگر آپؐ آپؐ ہیں

معصوم تو کئی ہیں مگر آپؐ آپؐ ہیں

---

چمکی ہے جس طرف بھی تقدس کی روشنی

نظریں ادھر اُٹھی ہیں مگر آپؐ آپؐ ہیں

---

اک سے ہے ایک بڑھ کے بڑا کائنات میں

سارے نبی نبی ہیں مگر آپؐ آپؐ ہیں

---

کتنے ہیں جن کی رہ میں شفق رنگ بدلیاں

بے ساختہ جھُکی ہیں مگر آپؐ آپؐ ہیں

---

یُوں تو کئی ہیں جن کے حسین لمس کے لیے

پلکیں بچھی ہوئی ہیں مگر آپؐ آپؐ ہیں

---

کتنے ہیں جن کا نام لیا ہے تو چار سو

صبحیں بکھر گئی ہیں مگر آپؐ آپؐ ہیں

---

ایسے بھی ہیں کہ جن کی جبینوں کو رفعتیں

جھک جھک کے چومتی ہیں مگر آپؐ آپؐ ہیں