فقیر و صاحبِ ثروت تونگر دیکھ آئے ہیں

فقیر و صاحبِ ثروت تونگر دیکھ آئے ہیں

جنھیں رب نے بلایا رب کا وہ گھر دیکھ آئے ہیں

---

سعادت حج و عمرہ کی بڑوں کو ہی نہیں ملتی

کرم سے تیرے مفلس بھی ترا در دیکھ آئے ہیں

---

وسائل ہو کے جو طیبہ نہ دیکھے ہے و ہ بد قسمت

ہیں وہ خوش بخت جو شہرِ پیمبر دیکھ آئے ہیں

---

سکندر بھی گدا بن کر پھرا کرتے ہیں طیبہ میں

سنا ہے ان سے جو سرکار کا در دیکھ آئے ہیں

---

کچھ ایسے بھی ہیں عشاقِ نبیؐ جو پا پیادہ ہی

دیارِ ہند سے طیبہ کو جا کر دیکھ آئے ہیں

---

ہے گلزارِ ارم کا حسن پھیکا سامنے جن کے

وہ لالہ زارِطیبہ کے گلِ تر دیکھ آئے ہیں

---

چلو پلکیں بچھائیں راہ میں ان خوش نصیبوں کی

جو کعبے کی فضا، طیبہ کا منظر دیکھ آئے ہیں

---

سفر معراج کا جس گھر سے فرمایا تھا آقاؐ نے

یہ زائر اُمّ ہانی کا بھی وہ گھر دیکھ آئے ہیں

---

ملے توفیقِ حج ہم کو تو پھر ہم بھی کہیں احسؔن

جو چوما ہے نبیؐ نے ہم وہ پتھر دیکھ آئے ہیں