ہماری دنیا میں کیا رکھا تھا جو شاہِ بطحا مِلا نہ ہوتا

ہماری دنیا میں کیا رکھا تھا جو شاہِ بطحا مِلا نہ ہوتا

وہاں پہ لوح و قلم نہ ہوتے یہاں پہ غارِ حِرا نہ ہوتا

---

کبھی نہ آتی کہیں سے خوشبو کہیں نہ کوئی گلاب کھلتا

ازل سے اب تک جہاں جہاں بھی زمیں پہ جو کچھ ہوا نہ ہوتا

---

تمام کعبے ، تمام معبد ترستے رہتے مجاوروں کو

دعا نہ ہوتی قبول کوئی ، کسی کا سجدہ ادا نہ ہوتا

---

کوئی بھی آتا کلیم بن کر نہ اپنے ربّ سے کلام کرنے

تمام آنکھیں ترستی رہتیں کوئی بھی جلوہ نُما نہ ہوتا

---

ہمارے جیسے ہجوم لاکھوں بھٹکتے پھرتے مقابروں میں

سکونِ دل کے لیے کسی کو بھی سبز گنبد عطا نہ ہوتا

---

نہ صبحیں آکر سلام کرتیں نہ راتیں ہم سے کلام کرتیں

اگر جبینِ فلک پہ اسمِ رسولِ رحمت لکھا نہ ہوتا

---

ہمارے جیسے گِرے پڑوں کی نجانے جانوں پہ کیا گزرتی

مرے نبی کا یہ بابِ رحمت اگر ہمیشہ کھلا نہ ہوتا

---

عمر نہ ہوتا علی نہ ہوتا کسی کی بنتی نہ بات انجؔم

کوئی بھی ہوتا نہ کوہِ عظمت کوئی بھی شیرِ خدا نہ ہوتا