ہُوک اٹھتی ہے جب بھی سینے سے

ہُوک اٹھتی ہے جب بھی سینے سے

ربط بڑھتا ہے کچھ مدینے سے

---

صرف عشقِ نبی ؐ ہے ایسی شراب

ہوش بڑھتا ہے جس کے پینے سے

---

بے نیازی اسی کا حصّہِ ہے

بھیک جس کو ملے مدینے سے

---

عرش پر ہے دماغ پھولوں کا

پا کے خوشبو ترے پسینے سے

---

ان کی رحمت ہے پاسباں جس کی

کون ٹکرائے اس سفینے سے

---

رد دعائیں نہیں ہوا کرتیں ،

ہاں مگر مانگئیے قرینے سے

---

میں خدائے کریم تک پہنچا

نسبتِ مصطفؐےٰ کے زینے سے

---

دل غنی ہےتمہاری الفت سے

مطمئن ہوں میں اس خزینے سے

---

ہو نہ عشقِ نبیؐ اگر خالدؔ،

آب چھن جائے آبگینے سے