جانِ عالَم فخرِ آدم شاہِ بطحا زندہ باد
نورِ اوّل شمعِ ایماں ماہِ طیبہ زندہ باد
محرمِ اسرارِ قدرت عالمِ علمِ یقیں
نازشِ دیں، زینتِ عرشِ معلّٰی زندہ باد
نور کی خیرات جس سے لے رہے ہیں مہر وماہ
آمنہ کے لال کا پُر نور چہرہ زندہ باد
آسمانِ علم و حکمت کے درخشاں آفتاب
کوکبِ بُرجِ ہدایت، شاہِ بطحا زندہ باد
یا خدا اس آرزو کو دے حقیقت کا لباس
زندہ باد اے آرزوئے باغِ طیبہ زندہ باد
باعثِ تخلیق عالَم، نازشِ دنیا و دیں
فخرِ عالم، فخرِ آدم، فخرِ حوّا زندہ باد
روضہ و منبر کے بیچوں بیچ حصّہ ارض کا
جنّتی ٹکڑوں میں ہے وہ ایک ٹکڑا زندہ باد
میرے آقا، میرے داتا، میرے ملجا آپ ہیں
اے مری حاجات کے قبلہ اور کعبہ زندہ باد
ان کے حسن و دلکِشی کا حال کچھ مت پوچھیے
مظہرِ حسنِ ازل جانِ تجلّیٰ زندہ باد
مصطفیٰ شمس الضحیٰ بدر الدُّجیٰ نور الہُدیٰ
شانِ عالَم، جانِ عالَم، شاہِ بطحا زندہ باد
عرش و کرسی مدحتِ سرکار میں رطبُ اللّسان
اور کرتی ان کی مدحت "شاخِ طوبیٰ" زندہ باد
اللہ اللہ پاؤں کی ٹھوکر سے مُردے جی اٹھیں
اے طبیبِ دوجہاں، جانِ مسیحا زندہ باد
آپ کے دربار سے اے سرورِ ہر دوسرا
ہر گھڑی بخشش کا چشمہ ہے اُبلتا زندہ باد
نعتِ احمد شوق سے کرتے رہو احمدؔ رقم
شاعری میں نعت کا ہے خوب چرچا زندہ باد
شاعر کا نام :- مولانا طفیل احمد مصباحی
کتاب کا نام :- حَرفِ مِدحَت