کدی آقا در تے بلا سو کہ ؟ کوئی ناں
کدی پاک روضہ دکھا سو کہ ؟ کوئی ناں
میں اکھیاں دی جھولی وچھا کے ہاں بیٹھا
میں پلکاں تے اتھرو سجا کے ہاں بیٹھا
کدی خیر جلوے دی پا سو کہ ؟ کوئی ناں
ناں کم کوئی اوندی اے تدبیر میری
سگوں ڈیگ دتا اے تقدیر میری
کدی بانہوں پھڑ کے اُٹھا سو کہ ؟ کوئی ناں
ہے کعبے دا کعبہ تیرا آستانہ
سدا وسے دربار تیرا شہانہ
میرے دل دی دُنیا وسا سو کہ ؟ کوئی ناں
میرے دل چہ اگاں جدائیاں نے لائیاں
میں تڑپاں تے روواں تے دیواں دُہائیاں
میرے رنج و غم ہُن مٹا سو کہ ؟ کوئی ناں
ایہہ دُکھڑے تیرے بن میں کس نوں سناواں
تیرا ہو کے آقا میں کس در تے جاواں
میرے حال تے ترس کھا سو کہ ؟ کوئی ناں
کرم کرنا صائم تے محبوب میرے
میں پڑھدا قصیدے ہاں دن رات تیرے
میری جھوک اُجڑی وسا سو کہ ؟ کوئی ناں
شاعر کا نام :- علامہ صائم چشتی
کتاب کا نام :- کلیات صائم چشتی