کیوں نہ ہوں میں قربانِ محمدؐ صلی اللہ علیہ وسلم
ہاتھ میں ہے دامانِ مُحمَّد صلی اللہ علیہ وسلم
پھیلی ہوئی ہے ہر دوجہاں میں فرش ِ زمیں پر کون و مکاں میں
خوشبوئے بستانِ مُحمَّد صلی اللہ علیہ وسلم
حق نے عطا کی معراج ان کو بخشا شفاعت کا تاج ان کو
اللہ اللہ شانِ مُحمَّد صلی اللہ علیہ وسلم
قدموں میں تھی گو ان کے شاہی پر وہ تھے مستِ عشقِ الٰہی
فقر رہا سامانِ مُحمَّد صلی اللہ علیہ وسلم
کیوں ہے جہاں آئینہ ساماں کھِل نہ سکے گا قلب پریشاں
دل تو ہے حیرانِ مُحمَّد صلی اللہ علیہ وسلم
آؤ چلو طیبہ ہوآئیں اپنا مقدر چل کے بنائیں
بن جائیں مہمانِ مُحمَّد صلی اللہ علیہ وسلم
دنیا کا ارمان کروں کیوں دنیا پر بہزادؔ مروں کیوں
کافی ہے ارمانِ مُحمَّد صلی اللہ علیہ وسلم
شاعر کا نام :- بہزاد لکھنوی
کتاب کا نام :- نعت حضور