مَیں کہاں، وہ سرزمینِ شاہِؐ بحرو بر کہاں

مَیں کہاں، وہ سرزمینِ شاہِؐ بحرو بر کہاں

اُن کے نقشِ پا پہ سجدہ کر سکے وہ سَر کہاں

---

اس سے بہتر، اِس سے برتر، اِس سے بڑھ چڑھ کر کہاں

دلربائی میں جوابِ گُنبدِ اخضر کہاں

---

آگئی ہے یاد اُن کی، لے اُڑا ہے جذبِ شوق

اب ٹھہر سکتا ہے پہلو میں دلِ مضطر کہاں

---

ہو چراغاں لاکھ، لیکن ظلمتیں مِٹتی نہیں

اُن کا جلوہ ہی نہ ہو جس میں، وہ روشن گھر کہاں

---

چاہتا ہوں، زندگی گزرے دیارِ پاک میں

شوق وارفتہ سہی، ایسا مقدّر پر کہاں

---

یا محمدؐ کہہ کے ، عاصہ حشر میں چُپ ہوگئے

گفتگو کی تاب، پیشِ داورِ محشر کہاں

---

اُن کی الفت میں نہیں گنجائش چون و چرا

کفر ہے اِس راہ میں کب، کیسے، کیا، کیوں کر، کہاں

---

راہِ عشقِ مصطفیٰؐ میں ذوق ہے زادِ سفر

رہرووں کے پاس کوئی بوریا، بستر، کہاں

---

طائرِ دل سُوئے عصیاں لاکھ پر مارے، مگر

دام ِرحمت سے بھلا یہ جائے گا بچ کر کہاں

---

سنگِ اسود ہے نصیرؔ اپنی جگہ اپنا جواب

زینتِ دیوارِ کعبہ یُوں کوئی پتّھر کہاں