محبوب میرے آجا ، رو رو کے ناں مر جاواں
ڈب ہنجواں دے وِچ چلیاں ، جے آویں تے تر جاواں
اک تیرا دواره ای ، دُکھیاں دا سہارا اے
در چھڈ کے تیرا شاہا ، جاواں تے کدھر جاواں
جی کردا زیارت لئی ، رو رو کے کراں عرضاں
اوقات میں فیر اپنی ، جد ویکھاں تے ڈر جاواں
ایہہ من دا ہاں میں تیرے ، دیدار دے قابل نہیں
مولا تیری بستی دا، دیدار تے کر جاواں
معراج ہے بس ایہو ، اس ہجر دے مارے دی
سرکار دے راہواں تے ، سر رکھ کے گزر جاواں
غم تیرے چ محبوبا ، تھم رو پئے کھجوراں دے
انسان ہاں میں کیویں ، دُکھ ہجر دا جر جاواں
جی کردا اے صائم دا ، ہن شعر ناں جوڑاں میں
سب ورقے کتاباں دے ، بس ہنجواں تھیں بھر جاواں
شاعر کا نام :- علامہ صائم چشتی
کتاب کا نام :- کلیات صائم چشتی