سناواں کی میں آقا گل تیرے دربار عالی دی
کدی حسنین دا صدقہ بھرو جھولی سوالی دی
ناں جائیے یا رسول اللہ تیرے دربار چوں خالی
رہوے اکھاں چ تابانی تیرے روضے دی جالی دی
جناب فاطمہ زہرا دی چادر پاک دے صدقے
شہا ہن لاج رکھ لیناں میری اس جھولی خالی دی
عُمر صدیق دے صدقے علی عثمان دے صدقے
عطا ہووے ادا مینوں وی اک عشق بلالی دی
سلامی لئو غریباں دی مدینے والیو لوکو
تُساں نوں رب پناہ دتی اے دو عالم دے والی دی
سلام اے گُنبدِ خضری سلام اے مسجدِ نبوی
نرالی شان ہے ہر دم تیری شان جمالی دی
ایہہ ہے پیغام صائم نے مدینے والیا گھلیا
ہے سُرخی ہر سطر وچ اوہدیاں ہنجواں دی لالی دی
شاعر کا نام :- علامہ صائم چشتی
کتاب کا نام :- کلیات صائم چشتی