سرورِ سروراں فخرِ کون و مکاں، کوئی تجھ سا کہاں کوئی تجھ سا کہاں
تیری چوکھٹ ہے بوسہ گہِ قُدسیاں، کوئی تجھ سا کہاں کوئی تجھ سا کہاں
جو زمانے میں پامال و بدحال تھے، ان کو بخشے ہیں تو نے نئے ولولے
تجھ سے روشن ہوا بختِ تیرہ شباں، کوئی تجھ سا کہاں کوئی تجھ سا کہاں
حدِّ روح الامینی سے بھی ماوراء خوش خرامی ہوئی تیری مُعجِز نُما
اے گلستانِ وحدت کے سروِ رواں، کوئی تجھ سا کہاں کوئی تجھ سا کہاں
تیرا طرزِ تکلّم ہے موجِ صبا تیرے الفاظ پر نُور و نکہت فدا
نطق سے تیرے ناطق ہے ربِ جہاں، کوئی تجھ سا کہاں کوئی تجھ سا کہاں
زینت افزائے بُرجِ "دَنَا" ہے توئی مسند آرائے عرشِ عُلا ہے توئی
ہے توئی بزمِ "قوسین" کا رازداں، کوئی تجھ سا کہاں کوئی تجھ سا کہاں
تیری رحمت، عداوت فراموش ہے تو عطا پاش ہے تو خطا پوش ہے
دشمنِ جاں کو بھی تو نے بخشی اماں، کوئی تجھ سا کہاں کوئی تجھ سا کہاں
وہ جسے تیرا آئین مرغُوب ہے، کب وہ تہذیبِ حاضِر سے مرعُوب ہے
تیری سیرت تمدُّن کی روحِ رواں، کوئی تجھ سا کہاں کوئی تجھ سا کہاں
قائدِ انس و جاں مالکِ خشک و تر رہبرانِ اُمم تیرے دریوزہ گر
تیرا ہر نقشِ پا نورِ دیدہ وراں، کوئی تجھ سا کہاں کوئی تجھ سا کہاں
بانوے بانوانِ جہاں فاطمہؑ حیدر و شبّرؑ و شاہِ گلِ گوں قباؑ
تیری عترت سے قائم ہے حق کا نشاں، کوئی تجھ سا کہاں کوئی تجھ سا کہاں
میرے الفاظ درماندہ و بے نوا، میرا سرمایہء فکر و فن نارسا
مجھ سا عاجز کہاں تیری مدحت کہاں، کوئی تجھ سا کہاں کوئی تجھ سا کہاں
شاعر کا نام :- سیّد شاکر القادری چِشتی نِظامی
کتاب کا نام :- چراغ