وہ جہاں ہیں مِری نِسبت ہے وہاں سے پہلے

وہ جہاں ہیں مِری نِسبت ہے وہاں سے پہلے

حسرتِ خُلد مدینہ ہے جِناں سے پہلے

---

ہم گنہگاروں کی سرِ کار دو عالم کے طفیل

ہوگی بخشش بھی تو بخشش کے گماں سے پہلے

---

دِلِ بے تاب تڑپ کر تُو انہیں یاد تو کر

وہ تو اِمداد کو آتے ہیں فُغاں سے پہلے

---

جان کی جان نِکل جائے قیامت ہو جائے

دِل اگر ان پہ فِدا ہو مِری جاں سے پہلے

---

یہ ہے کعبہ ، یہ مدینہ، یہ تِرا نقشِ قدم

اِبتدا ہو مِرے سجدوں کی کہاں سے پہلے

---

دِل نے پائی ہی نہ تھی لذّتِ عشقِ احمدؐ

اے بلالِ حبشی تیری اذاں سے پہلے

---

آپ تھے آپ فقط صورتِ انوارِ خدا

اور کوئی بھی نہ تھا کون و مکاں سے پہلے

---

نعت کہتا ہوں میں سرکار پہ پڑھ پڑھ کے دُرود

چُوم لیتا ہوں قلم اپنا بیان سے پہلے

---

دیکھ لوں کاش میں وہ روئے منّور خالِدؔ

باغِ ہستی میں بہَار آئے خِزاں سے پہلے