زندگی جب تھی، یہ جینے کا قرینہ ہوتا

زندگی جب تھی، یہ جینے کا قرینہ ہوتا

رُخ سُوئے کعبہ، تو دل سُوئے مدینہ ہوتا

---

نعرہ طوفاں میں جو ’’یا شاہِؐ مدینہ‘‘ ہوتا

غیر ممکن تھا کہ غرقاب سفینہ ہوتا

---

یُوں مدینے میں شب و روز گزرتے اپنے

دن صدی ہوتا، ہر اک لمحہ مہینہ ہوتا

---

گرمیٔ حُسنِ رسالت کی اِسے تاب کہاں

ورنہ کیوں کفر کے ماتھے پہ پسینہ ہوتا

---

جلوۂ سرورِؐ کونین سماتا اُس میں

کاش اِتنا تو کُشادہ مِرا سینہ ہوتا

---

اُسوۂ پاک پہ کرتی جو عمل آج اُمّت

کسی دل میں نہ کَپٹ ہوتی، نہ کِینہ ہوتا

---

پر توِ حُسنِ نبیؐ کی جو جھلک پڑ جاتی

داغ کہتے ہیں جسے، دل کا نگینہ ہوتا

---

یہی خواہش تھی، یہی اپنی تمنّا تھی نصیرؔ

میرا سَر، اور درِ شاہِؐ مدینہ ہوتا