حضور! ایسا کوئی انتظام ہو جائے

حضور! ایسا کوئی انتظام ہو جائے

سلام کے لیے حاضر غلام ہو جائے

---

نظر سے چوم لوں اِک بار سبز گنبد کو

بلا سے پھر میری دنیا میں شام ہو جائے

---

تجلّیات سے بھر لوں میں کاسئہ دل و جاں

کبھی جو اُن کی گلی میں قیام ہو جائے

---

حضور آپ جو چاہیں تو کچھ نہیں مشکل

سمٹ کے فاصلہ یہ چند گام ہو جائے

---

حضور آپ جو سُن لیں تو بات بن جائے

حضور آپ جو کہہ دیں تو کام ہو جائے

---

ملے مجھے بھی زبانِ بو صیریؔ و جامی ؔ

مرا کلام بھی مقبولِ عام ہو جائے

---

مزا تو جب ہے فرشتے یہ قبر میں کہہ دیں

صبؔیح! مدحتِ خیر الانام ہو جائے