آپ کے قدموں پہ سر رکھنا مری معراج ہے

آپ کے قدموں پہ سر رکھنا مری معراج ہے

آپ کا نقشِ کفِ پا میرے سر کا تاج ہے

---

آپ کے ادنیٰ غلاموں کا ہوں میں ادنیٰ غلام

میرے دل کی مملکت پر آپؐ ہی کا راج ہے

---

عشق میں کوئی دکھائے بن کے بو بکر و بلال

کہنے کو تو ہر کوئی یاں سرمد و حلّاج ہے

---

آپ کے نور رسالت سے جہاں روشن ہوا

اس جہاں کا ذرّہ ذرّہ آپؐ کا محتاج ہے

---

کس طرح آئے دلِ بے تاب کو میرے قرار

یہ سمندر کی طرح مجموعہءِ امواج ہے

---

اے مرے شاہا مرے آقا مری جاں کے قریب

آپ جیسا تھا کوئی پہلے نہ کوئی آج ہے

---

آپ کا انجؔم تو ہے بس اک گدائے بے نوا

یہ نہ صوفی ہے نہ عارف ہے نہ یہ الحاج ہے