عرب دی ریت وچ تردے ستارے یاد آگئے نے
میں تاں روناں واں طیبہ دے نظارے یاد آگئے نے
نظر اٹھی تے اُٹھی رہ گئی سی پاک روضے ول
نظر پتھرائی وچ ہنجواں دے دھارے یاد آگئے نے
کِتے فریاد ہندی ہی کِتے سن سسکیاں ہاواں
اوہ منظر درد دے سارے دے سارے یاد آگئے نے
میں کیوں نہ جان تائیں اوہناں دے لیکھے ای لا دیواں
جو میری جان توں مینوں پیارے یاد آگئے نے
محلاں اُچیاں تائیں محبت نال کیوں ویکھاں
حلیمہ سعدیہ دے کچے ڈھارے یاد آگئے نے
نہ ہُن مینوں ڈراؤ واعظو میرے گناہواں توں
میرے ڈھولن دی رحمت دے اشارے یاد آگئے نے
میرے لوں لوں چ صائم چلدیاں نے غم دیاں چھریاں
خدا جانے ایہہ کیہڑے غم دے مارے یاد آگئے نے
شاعر کا نام :- علامہ صائم چشتی
کتاب کا نام :- کلیات صائم چشتی