اللہ اے کلا جان دا رتبہ عرب دے ڈھول دا
جس دی زبان پاک چوں خود آپ اللہ بولدا
قیدی خلاصی پاوندے ، سارا زمانہ مہک دا
وَاليْل زلفاں دے جدوں سوہنا ولاں نوں کھول دا
شمسُ الضُّحَى بَدِرُ الدُّجى صَدْرُ العُلَى نُور الهدىٰ
نعت اوہدی ای قرآن دا، ورقہ ہاں جیہڑا پھولدا
کنڈا یقیناً اوس دے ہتھاں چ ہے انصاف دا
پر رحمۃ للعالمین نہیں جُرم ساڈے تول دا
ساحل توں بھاویں دور ہاں، طوفان وچ مجبور ہاں
میں یا محمد ﷺ کہہ لواں جد وی سفینہ ڈولدا
سارا زمانہ پل رہیا اوسے دے دسترخوان توں
سارا زمانہ اوس دی خیرات پِھر دَا ٹول دا
طیبہ دی میں خیرات توں صائم ہاں واقف ہو گیا
کُھلدا نئیں ہوراں سامنے ، ہُن منہ مرے کشکول دا
شاعر کا نام :- علامہ صائم چشتی
کتاب کا نام :- کلیات صائم چشتی