ہادئ و رہبر و امام تم پہ درود اور سلام
بخشش و رحمت تمام تم پہ درود اور سلام
جامع حُسنِ کُل صفات وجہِ وجودِ کائنات
فرش نشیں فلک مقام تم پہ درود اور سلام
عرش کی آرزو ہو تم فرش کی آبرو ہو تم
خلق تمہاری ہے غلام تم پہ درود اور سلام
حُسنِ کرم تمہاری بات حُسنِ عطا تمہاری ذات
حُسن ہی حُسن ہو تمام تم پہ درود اور سلام
قند و نبات و انگبیں جانِ حیات و روحِ دیں
ایک سخن ہزار نام تم پہ درود اور سلام
غنچہ و برگ و گُل کلی ، جس کی زباں جہاں کُھلی
سب نے کیا یہی کلام تم پہ درود اور سلام
مدح تمہاری اور ادیبؔ ایسے کہاں تھے یہ نصیب
اب میں ہوں اور صبح و شام ، تم پہ درود اور سلام
شاعر کا نام :- حضرت ادیب رائے پوری
کتاب کا نام :- خوشبوئے ادیب