کملی والیا نظر کرم دی کر جانا
خالی جھولیاں سب دیاں شاہا بھر جانا
یار دی برم سجا کے جیہڑے بیٹھے نے
طیبہ ول جو نظراں لا کے بیٹھے نے
اج اوہناں دی آس دا بیڑا تر جانا
کملی والیا نظر کرم دی کر جانا
روک عقل نوں پیار دی حد ناں لنگھی جا
عشق نبی دا اللہ کولوں منگی جا
عشق نے جیتناں عقلاں والیاں ہر جانا
کملی والیا نظر کرم دی کر جانا
اکھیاں دا دروازہ ڈھو کے دیکھ تے سہی
پاک نبی دی یاد چہ رو کے دیکھ تے سہی
ٹھنڈ اکھیاں نوں پینی سینہ ٹھر جانا
کملی والیا نظر کرم دی کر جانا
اوہ شبیر دے جھنڈے تھلے آون گے
رب دے کولوں نویں حیاتی پاون گے
پڑھ دیاں سن دیاں نعت جہناں نے مر جانا
کملی والیا نظر کرم دی کر جانا
صائم تے احسان کریماں تیرے نے
ہن ایہو ارمان اخیری میرے نے
وقت نزع دے ہتھ سینے تے دھر جانا
کملی والیا نظر کرم دی کر جانا
شاعر کا نام :- علامہ صائم چشتی
کتاب کا نام :- کلیات صائم چشتی