میں خدمتِ آقاؐ میں ہوتا تو سدا کہتا لبّیکَ و سَعْدَیْکَ

میں خدمتِ آقاؐ میں ہوتا تو سدا کہتا لبّیکَ و سَعْدَیْکَ

جس طرح تنِ مردہ سرکارؐ سے کہتا تھا لبّیکَ و سَعْدَیْکَ

---

آجاتا بلاوا گر دربارِ مدینہ سے ، سرکارؐ ِ مدینہ سے

بے برگ ہی چل دیتا ہر گام پہ میں پڑھتا لبّیکَ و سَعْدَیْکَ

---

سرکارؐ کے قدموں میں جس وقت کھڑا ہوتا، یا گر کے پڑا ہوتا

کہتا تو یہی کہتا ، حاضر ہے غلام آقاؐ لبّیکَ و سَعْدَیْکَ

---

سنتے ہیں کہ مرقد میں تشریف وہ لائیں گے ، تقدیر جگائیں گے

مَیں اٹھ کے قدم لوں گا اور لب پہ مرے ہوگا لبّیکَ و سَعْدَیْکَ

---

اے کاش مجھے تائب وہ خلد میں بلوائیں اور حکم یہ فرمائین

ہاں چھیڑ وہی نغمہ لبّیکَ و سَعْدَیْکَ لبّیکَ و سَعْدَیْکَ