مرحبا ختمِ مُرسلیںؐ آئے
فخرِ دنیا و فخرِ دیں آئے
پستیوں کو بلندیاں دینے
فرش پر عرش کے مکیں آئے
یہ ہمارے نصیب ہیں ورنہ
آسماں بر سرِ زمیں آئے
سب نبی اپنے عہد کے تھے نبی
لیکن اب عہد آفریں آئے
سب سے بڑھ کر جہاں ضرُورت تھی
باعثِ کُن فکاں وہیں آئے
کنجِ خلوت بھی بزمِ عرفاں ہے
یہ بتانے حِرا نشیںؐ آئے
آپؐ اُن کے لئے بھی رحمت ہیں
جو زمانے ابھی نہیں آئے
ظلم ہے ظلم کا جواب مگر
آپؐ اس کے لئے نہیں آئے
مُجھ سا عاصی اور اُنؐ کی چشمِ کرم
ہائے کِس طرح سے یقیں آئے
شاعر کا نام :- حنیف اسعدی
کتاب کا نام :- ذکرِ خیر الانام