نبیوں کے سردار حبیبِ ربِ اکبر
شان ہے جن کی انا اعطینک الکوثر
سب سے اعلیٰ سب سے اولیٰ نبی ہمارے
رحمتِ عالم، نورِ مجسم، شافعِ محشر
ان کی حیاتِ پاک کے یہ سب آئینے تھے
حضرات صدیق و عمر، عثمان و حیدر
محشر میں بس انہی کے ہاتھوں پیاس بجھے گی
انہی کو رب نے عطا کیا ہے حوضِ کوثر
کتبِ سماوی دیتی رہی ہیں ان کی بشارت
خبر انہی کی لاتے رہے سارے پیغمبر
انہی کی نسلِ پاک کی نورانی کڑیاں تھیں
فاطمتہ الزہرا و علی، شبیر و شبر
قرآں ان کا سب سے بڑا اعجاز ہے نظمی
وحیِ الہٰی جس کی صورت اتری ان پر
شاعر کا نام :- سید آل رسول حسنین میاں برکاتی نظمی
کتاب کا نام :- بعد از خدا